តារាសម្ដែង និងចម្រៀងអាជីពអ្នកនាង ឌី សូនីតា ថ្មីៗនេះបានធ្វើឱ្យមហាជនជាពិសេសអ្នកគាំទ្រមានការភ្ញាក់ផ្អើលយ៉ាងខ្លាំង ខណៈស្ងាត់ៗស្រាប់តែធ្លាយដំណឹងថាតារាស្រីរាងតូចច្រឡឹងរូបនេះមានទំនាក់ទំនងជាមួយតារាចម្រៀងវ័យក្មេង ណាន វីសារ ។ ដំណឹងដែលគ្មានអ្នកនឹកស្មានដល់នេះបានលេចចេញឡើយក្រោយទំព័រហ្វេសប៊ុកមួយទម្លាយរូបភាពស្និតស្នាលរបស់អ្នកទាំងពីរ និងបង្ហើបថា ពួកគេត្រៀមដឹកដៃគ្នាចូលរោងការថែមទៀតផង ។
យ៉ាងណាក្រោយដំណឹងនេះបានល្បីខ្ទរខ្ទារ និងមានការចុះផ្សាយពីបណ្ដាសារព័ត៌មានផងនោះ ស្រាប់តែតារាស្រីកូនមួយរូបនេះបានបង្ហោះសារប្លែកៗជាច្រើនបន្តបន្ទាប់ថែមទៀតធ្វើឱ្យកាន់តែមានការចាប់អារម្មណ៍ខ្លាំងឡើង ។ ប៉ុន្តែតាមរយៈសំណេរដែលតារាស្រីរូបនេះបង្ហោះមហាជនបានសន្និដ្ឋានថា ដំណឹងដែលបែកធ្លាយនោះហាក់មិនមែនជាការពិតឡើយ ។ កាន់តែច្បាស់ជាងនេះទៀតនោះនៅមុននេះអ្នកនាង ឌី សូនីតា បានបញ្ជាក់នៅលើបណ្ដាញសង្គមរបស់ខ្លួនយ៉ាងដូច្នេះថា នាងគ្រាន់តែស្លៀកឈុតនេះលេងតែប៉ុណ្ណោះ ព្រោះអ្នកនាងជាម្ចាស់សម្អាងការស្រាប់ ។
សូមបញ្ជាក់ថា ថ្មីៗនេះអ្នកប្រើប្រាស់បណ្ដាញសង្គម ពិសេសអ្នកគាំទ្ររបស់តារាសម្ដែង និងចម្រៀង ឌី សូនីតា និងកម្លោះសង្ហាជាអតីតបេក្ខភាពកម្មពិធី Cambodian idol រដូវកាលទី៤ ណាន វីសា មានការភ្ញាក់ផ្អើលយ៉ាងខ្លាំង ខណៈមានដំណឹងថា អ្នកទាំងពីរមានទំនាក់ទំនងស្នេហា និងត្រៀមដឹកដៃគ្នាចូលការឆាប់ៗថែមទៀតផង ។
ដោយតាមរយៈការបង្ហោះរបស់ទំព័រហេ្វសប៊ុកមួយដែលមានរូបភាពរបស់អ្នកនាង ឌី សូនីតា និងតារាចម្រៀងវ័យក្មេង ណាន វីសា និងភ្ជាប់សំណេរអបអរចំពោះតារាចម្រៀងប្រុសស្រីទាំងពីរដួងខាងលើ និងបញ្ជាក់យ៉ាងដូច្នេះថា នេះជាការណាត់ជួបគ្នាលើកដំបូងរវាងអ្នកនាង ឌី សូនីតា និងលោក ណាន វីសា និងមានដំណឹងល្អឆាប់ៗថែមទៀតផង ។
ប្រភពបានបង្ហើបថា «អាយុគ្រាន់តែជាតួលេខ ខាងស្រីបងខាងប្រុសជាង១០ឆ្នាំ គោរពការសម្រេចចិត្ត Idol Visa Nan ណាន វីសារ អបអរសាទរ ថ្ងៃណាត់ជួបលើកដំបូង ត្រៀមចូលរោង ពិភពលោកនេះពណ៌ស៊ីជម្ពូល្អណាស់ Dy Sonita» ។
គេមិនដឹងថា ដំណឹងនេះជាការពិត ឬគ្រាន់តែជាការថតសម្ដែងអ្វីមួយនោះឡើយ ប៉ុន្តែបន្ទាប់ពីដំណឹងនេះបានទម្លាយគឺមានការចែករំលែកជាច្រើន ក្នុងនោះក៏មានការសាទរជាច្រើនចំពោះម្ចាស់ពានកម្មពិធីប្រឡងចម្រៀង I’m Singer Cambodia ឌី សូនីតា និងកម្លោះសង្ហា ណាន វីសារ ។ ប៉ុន្តែក៏មានមន្ទិលសង្ស័យថា ភាពស្និតស្នាលរបស់អ្នកទាំងពីរគ្រាន់តែជាការថតបទចម្រៀងតែប៉ុណ្ណោះ ។ ជាការពិតនៅមុននេះអ្នកនាង ឌី សូនីតា បានបញ្ជាក់ហើយ ។ បើទោះជាមានការបញ្ជាក់ពីអ្នកនាង ឌី សូនីតា យ៉ាងណាក៏ដោយ តែមហាជនមួយចំនួននៅតែដាក់ការសង្ស័យលើតារាប្រុសស្រីមួយគូនេះផងដែរ ៕ 
