អ្នកឧកញ៉ា ឡេង ណាវ៉ាត្រា រៀបចំកម្មវិធីជួបជុំអាហារសាមគ្គី ថ្លែងអំណរគុណដល់បុគ្គលិករាប់ពាន់នាក់របស់មហាគ្រួសារក្រុមហ៊ុនហ្គាឡាក់ស៊ី ណាវាត្រា គ្រុប

(ភ្នំពេញ)៖ កាលពីល្ងាចថ្ងៃទី២១ ខែសីហា ឆ្នាំ២០២២នេះ អ្នកឧកញ៉ា ឡេង ណាវ៉ាត្រា អគ្គនាយកក្រុមហ៊ុនហ្គាឡាក់ស៊ី ណាវាត្រា គ្រុប និងថ្នាក់ដឹកនាំក្រុមហ៊ុនហ្គាឡាក់ស៊ី ណាវាត្រា គ្រុប បានរៀបចំកម្មវិធីសំណេះសំណាល អាហារសាមគ្គីជួបជុំមហាគ្រួសារក្រុមហ៊ុនហ្គាឡាក់ស៊ី ណាវាត្រា គ្រុប ដែលមានវត្តមានចូលរួមពីសំណាក់បុគ្គលិកក្រុមហ៊ុន អចិន្ត្រៃយ៍ ប្រមាណជាង១ពាន់នាក់ នៅភោជនីយដ្ឋានទន្លេបាសាក់២។

កម្មវិធីជួបជុំអាហារសាមគ្គីដ៏ធំនេះ មិនមែនគ្រាន់តែការជួបជុំ កម្សាន្តសប្បាយ ពិសារភោជនីយអាហារជុំគ្នានោះទេ តែជាឱកាសសម្រាប់អ្នកឧកញ៉ា ឡេង ណាវ៉ាត្រា ដែលជាអគ្គនាយកក្រុមហ៊ុន និងថ្នាក់ដឹកនាំក្រុមហ៊ុនធ្វើការថ្លែងអំណរគុណ ចំពោះបុគ្គលិកទាំងអស់គ្នា ដែលតែងបានបំពេញភារកិច្ចការងារ និងតួនាទីរបស់ខ្លួនយ៉ាងសកម្ម ដែលជាកត្តារុញច្រាននាំឱ្យក្រុមហ៊ុនយក្សមួយនេះអាចរីកចម្រើនបានតាំងពីចំណុចសូន្យ រហូតមកដល់សព្វថ្ងៃនេះ។

ឆ្លៀតក្នុងឱកាសនេះ អ្នកឧកញ៉ា ឡេង ណាវ៉ាត្រា បានគូសបញ្ជាក់យ៉ាងច្បាស់ៗថា ក្រុមហ៊ុនហ្គាឡាក់ស៊ី ណាវាត្រា គ្រុប តែងផ្តល់តម្លៃខ្ពស់ចំពោះអតីតភាពការងារ និងកិច្ចខិតខំប្រឹងប្រែងរបស់បុគ្គលិកនីមួយៗ ហើយអ្នកឧកញ៉ាផ្ទាល់ និងថ្នាក់ដឹកនាំក្រុមហ៊ុនគ្រប់ៗរូប តែងផ្តល់តំលៃ ការគោរពស្រឡាញ់ និងឱកាសចំពោះបុគ្គលិកទាំងអស់ស្មើៗគ្នា ដោយមិនមានប្រកាន់ពីតួនាទី ឋានៈ ឬកម្រិតចំណេះដឹងនោះទេ។ អ្នកឧកញ៉ាអគ្គនាយកក៏បានស្នើឱ្យបុគ្គលិកគ្រប់ៗរូបបន្តប្ដូផ្ដាច់លើថ្នាក់ដឹកនាំក្រុមហ៊ុន និងខិតខំប្រឹងប្រែងបង្កើនសមត្ថភាព និងបន្តស្រាក់ដៃគ្នាជាធ្លុងរួមមួយ ដើម្បីជំរុញក្រុមហ៊ុនហ្គាឡាក់ស៊ី ណាវាត្រា គ្រុប ឱ្យកាន់តែរីកលូតលាស់បន្ថែមទៀតទៅពេលអនាគត។

សូមបញ្ជាក់ថា ក្រុមហ៊ុនហ្គាឡាក់ស៊ី ណាវាត្រា គ្រុប ត្រូវបានបង្កើតឡើងតាំងពីឆ្នាំ២០១៧ ហើយមានទស្សនៈវិស័យ និងបេសកកម្មចម្បង ក្នុងការចូលរួមជាមួយរាជរដ្ឋាភិបាលកម្ពុជា បង្កើនការអភិវឌ្ឍសេដ្ឋកិច្ចជាតិ ជំរុញការប្រើប្រាស់ផលិតផលជាតិ បង្កើតឱកាសការងារជាមួយប្រាក់ចំណូលខ្ពស់ និងជាពិសេសគឺការផ្តល់ឱកាសវិនិយោគក្នុងតម្លៃសមរម្យ ការកម្សាន្តប្រកបដោយភាពទាក់ទាញ ជូនដល់បងប្អូនប្រជាពលរដ្ឋខ្មែរទាំងអស់គ្នា។ ក្រុមហ៊ុនមានប្រតិបត្តិការលើវិស័យសំខាន់ដូចជា វិស័យអចលនទ្រព្យ វិស័យសិល្បៈកម្សាន្ត វិស័យកសិកម្ម វិស័យមីក្រូហិរញ្ញវត្ថុ វិស័យអេកូទេសចរណ៍ និងវិស័យបច្ចេកវិទ្យាកសិ-ឧស្សាហកម្មជាដើម។ ក្នុងចក្ខុវិស័យទៅពេលអនាគត ក្រុមហ៊ុនក៏នឹងពិនិត្យឱកាសកិច្ចសហប្រតិបត្តិការថ្មីៗជាមួយវិនិយោគិនជាតិ និងអន្តរជាតិ ទាំងនៅក្នុងប្រទេស និងក្រៅប្រទេស លើវិស័យជាសក្តានុពលដូចជា វិស័យអប់រំ វិស័យទេសចរណ៍ អេកូ-ទេសចរណ៍ និងវិស័យអចលនទ្រព្យអាគារខុនដូ សំណង់ខ្ពស់ផងដែរ

កន្លងមក ក្រុមហ៊ុន ហ្គាឡាក់ស៊ី ណាវាត្រា គ្រុប តែងតែប្រកាន់ខ្ជាប់ការចូលរួមក្នុងសកម្មភាពទំនួលខុសត្រូវសង្គម ដោយបានចូលរួមជាបន្តបន្ទាប់ជាមួយរាជរដ្ឋាភិបាលកម្ពុជា និងកាកបាទក្រហមកម្ពុជា ក្នុងការអភិវឌ្ឍហេដ្ឋារចនាសម្ព័ន្ធ ជំនួយមនុស្សធម៌ ការចូលរួមប្រយុទ្ធប្រឆាំងជំងឺកូវីដ-១៩ និងសកម្មភាពជាប្រយោជន៍សង្គមដទៃទៀតជាច្រើន ដែលសរុបជាទឹកប្រាក់ជាង ២៣,៣លានដុល្លារអាម៉េរិក។

Leave a Reply

Your email address will not be published. Required fields are marked *