Johnny Depp បើកទំព័រជីវិតថ្មីទទួលការងារជាតួធំក្នុងភាពយន្តថ្មីក្រោយឈ្នះក្តីអតីតភរិយា

រូបភាពថ្មីរបស់តារាភាពយន្តហូលីវូតដ៏ល្បីលោក Johnny Depp បង្ហាញថាលោកថតភាពយន្តថ្មីលើកជាលើកដំបូងចាប់តាំងពីបន្តឹងបង្ខូចកេរ្តិ៍ឈ្មោះតម្លៃរាប់លានដុល្លារប្រឆាំងនឹងអតីតភរិយានាងAmber Heard ត្រូវបានបញ្ចប់។

រូបភាពជាច្រើនសន្លឹកបានបង្ហាញពីលោក Deppដ៏ស្រស់សង្ហាក្នុងឈុតមួកពណ៌ស និងក្រណាត់ខ្មៅចងបាំងភ្នែក ជារូបភាពសម្រាប់ភាពយន្តភាគថ្មីរបស់លោករឿង«Jeanne Du Barry» ដែលជាភាពយន្តថតដោយក្រុមហ៊ុនភាពយន្តបារាំង« Why Not Productions»។ តារាភាពយន្តវ័យ៥៩ឆ្នាំរូបនេះ បានឈ្នះបន្តឹងដ៏ល្បីល្បាញប្រឆាំងនឹងនាងHeard ជាអតីតភរិយាកាលពីខែមិថុនាកន្លងទៅនៅសហរដ្ឋអាមេរិក។

លោក Depp បានប្តឹងអតីតភរិយាពាក់ព័ន្ធនឹងអត្ថបទឆ្នាំ២០១៨ ដែលនាងសរសេរទៅកាសែត The Washington Post អំពីបទពិសោធន៍របស់នាងជាជនរងគ្រោះអំពើហិង្សាក្នុង គ្រួសារ។ រឿងនេះត្រូវបានមេធាវីរបស់លោកDepp លើកឡើងថាជាការចោទប្រកាន់មិនត្រឹមត្រូវចំពោះលោកDepp ដែលថាលោកជាមនុស្សប្រើប្រាស់អំពើហិង្សាដូច្នេះ។

តំណាងតារាភាពយន្តហូលីវូតរូបនេះលើកឡើងថា ការចោទប្រកាន់ពីសំណាក់អតីតភរិយា បានធ្វើអោយលោកDepp បាតបង់ឱកាសការងារជាច្រើន ដូចជាលោកត្រូវដកចេញពីការថតភាពយន្តស៊េរី Pirates Of The Caribbean ក្រោយកើតមានការចោទប្រកាន់ពីអតីតភរិយា។ ក្រោយមកបន្ទាប់ពីប្រើពេលកាត់ក្តីអស់រយៈពេល៦សប្តាហ៍ តុលាការអាមេរិកបានរកឃើញថា លោក Johnny Depp គ្មានកំហុសហើយតម្រូវអោយអតីតភរិយាសងសំណងជាង១០លានដុល្លារអាមេរិក៕