បញ្ហាឡើងគីឡូនៅតែជារឿងមួយដែលធ្វើឱ្យតារាចម្រៀង ស៊ូ ស៊ីរីកា មិនស្ងប់ក្នុងចិត្ត ខណៈរយៈពេលជាងមួយខែមកនេះ ស៊ីរីកា បានព្យាយាមទម្លាក់គីឡូចោលជាង១៥គីឡូដើម្បីឱ្យដល់គោលដៅមួយដែលនាងចង់បាន ។
អ្នកនិយមតាមដានសកម្មភាពប្រចាំថ្ងៃរបស់តារាចម្រៀងផលិតកម្មបារមីកញ្ញា ស៊ូ ស៊ីរីកា ប្រាកដបានដឹងហើយថា កន្លងមកអតីតតារាចម្រៀងស្រីរបស់ផលិតកម្មថោនរូបនេះបានព្យាយាមសម្រកទម្ងន់របស់ខ្លួនរហូតមក ដើម្បីឱ្យបានរាងស្អាតដែលខ្លួនចង់បាន ពោលគឺរាងអក្សរ S ។ ជារឿយៗម្ចាស់បទ «ឧបសគ្គស្នេហ៍» កញ្ញា ស៊ូ ស៊ីរីកា តែងតែហាត់ប្រាណ និងតមអាហារជាដើមដើម្បីឱ្យស្រកគីឡូ ជាក់ស្ដែងរយៈពេលជាង១ខែមកនេះ ស៊ីរីកា បានព្យាយាមសម្រកទម្ងន់រហូតដល់១៥គីឡូ ។ បើទោះជាយ៉ាងណាតារាស្រីរូបនេះនៅតែមិនទាន់ស្ងប់ចិត្តនោះឡើយ ខណៈនាងបានអះអាងថា នឹងបន្តសម្រក១០គីឡូទៀតដើម្បីឱ្យកាន់តែស្លីមជាងនេះបន្តទៀត ។ នេះបើយោងតាមការបញ្ជាក់ពីកញ្ញា ស៊ូ ស៊ីរីកា នៅព្រឹកនេះ ។
ដោយនៅលើបណ្ដាញសង្គមរបស់ខ្លួនកញ្ញា ស៊ូ ស៊ីរីកា បានអរគុណចំពោះខ្លួនឯងដែលបានខំប្រឹង និងអរគុណដល់បណ្ដាអ្នកគាំទ្រដែលបានលើកទឹកចិត្ត ។ នាងថា «ប៉ុណ្ណឹង ១៥គីឡូ មិនទាន់ដល់គោលដៅ តែទៅបណ្តើរៗហើយ អរគុណខ្លួនឯង នឹងall my lovely fans ដែលចាំលើកទឹកចិត្តទាំងអស់គ្នា ១០គីឡូទៀតម៉ាក់កា back» ។
សូមបញ្ជាក់ថា តារាចម្រៀងកញ្ញា ស៊ូ ស៊ីរីកា បានឡើងគីឡូខ្លាំងក្នុងរយៈពេលប៉ុន្មានឆ្នាំចុងក្រោយនេះ ហើយបញ្ហានេះបានក្លាយជារឿងមួយដែលធ្វើឱ្យតារាចម្រៀងមានទឹកដមសំនៀងរូបនេះមិនស្ងប់ចិត្តនោះឡើយ ខណៈរូបនេះបានព្យាយាមសម្រកជាបន្តបន្ទាប់ ។ ជាក់ស្ដែងថ្មីៗនេះ ស៊ូ ស៊ីរីកា បានបញ្ជាក់ថា នាងបានសម្រកទម្ងន់១៥គីឡូក្រាមក្នុងរយៈពេលជាង១ខែ និងបន្តសម្រក១០គីឡូទៀត ដើម្បីបានស្អាតដូចពីមុនវិញ ។
បើទោះជាយ៉ាងណាគេមិនដឹងថា តារាចម្រៀងស្រីខាងលើប្រើវិធីសាស្ត្របែបណាក្នុងសម្រកនោះទេ ខណៈអ្នកគាំទ្រជាច្រើនបានសុំឱ្យនាងបង្ហើបពីវិធីសាស្ត្រដ៏មានប្រសិទ្ធភាពនេះ ៕
