ស្នាដៃចម្រៀងចុងក្រោយរបស់តារារ៉េបជូរមុខលោក ជី ដេវីត បទ «មហានគរ បានកំពុងឈរលើលំដាប់រៀងទី៣នៃ Platform របស់យូធូប ឬ On Trending for music ។
បើទោះបីជាត្រូវបានអ្នកប្រើប្រាស់បណ្ដាញសង្គមមួយចំនួនវែកញែកលើទម្រង់អក្សរធំនៃចំណងជើងដែលមានលក្ខណៈដាំក្បាលចុះក្រោមយ៉ាងណាក្ដី តែបទចម្រៀងដែលបានរៀបរាប់ពីអច្ឆរិយរបស់ប្រទេសកម្ពុជាកាលពីសម័យមុនរហូតមកដល់បច្ចុប្បន្នរបស់លោក ជី ដេវីត បទ «មហានគរ» បានកំពុងតែពេញនិយមយ៉ាងខ្លាំង ខណៈដែលកម្ពុជាធ្វើជាម្ចាស់ផ្ទះនៃមហាព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ។ 
ក្រៅពីភាពល្បីល្បាញដែលរយៈពេលជាង១ថ្ងៃមានការទស្សនាជិត១លានដងនៅលើយូធូប និងជាងលានដងនៅលើហ្វេសប៊ុក បទ «មហានគរ» ក៏ត្រូវបានអ្នកលេងបណ្ដាញសង្គម និងប្រជាជនខ្មែរជាច្រើនស្ញើចសរសើរ និងស្ញប់ស្ញែងបំផុងចំពោះស្នាដៃនេះ ។ អ្នកលេងបណ្ដាញសង្គមជាច្រើនបានលើកឡើងថា បទចម្រៀងដែលមានបញ្ចូលដោយឧបករណ៍ភ្លេងខ្មែរជាច្រើន អមជាមួយនឹងអត្ថន័យ រៀបរាប់ពីប្រវត្តិសាស្ត្រកម្ពុជាដ៏អស្ចារ្យមួយនេះនឹងធ្វើឱ្យមហាព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ដែលកម្ពុជាធ្វើជាម្ចាស់ផ្ទះកាន់តែកក្រើកខ្លាំង ។
ប៉ុន្តែអ្នកប្រើប្រាស់បណ្ដាញសង្គមជាច្រើនក៏បានបង្ហាញការសោកស្ដាយ ក្រោយដឹងថាតារារ៉េបជូរមុខរបស់កម្ពុជារូបនេះមិនមានវត្តមាននៅក្នុងមហាព្រឹត្តិការណ៍នេះ ។ តែយ៉ាងណាបើទោះជាមិនមានវត្តមានសម្ដែងនៅក្នុងមហាព្រឹត្តិការណ៍នេះតែលោក ជី ដេវីត បានអះអាងថា គោលបំណងនៃការផលិតបទនេះ គឺលោកផលិតដោយមោទកភាព ក៏ដូចជាដើម្បីអបអរសាទរកម្ពុជាធ្វើជាម្ចាស់ផ្ទះ Sea Game ដែលជាពេលលាដែលពួកយើងរង់ចាំរយៈពេលជាង៦០ឆ្នាំមកនេះ ។
សូមបញ្ជាក់ថា បទ «មហានគរ» របស់លោក ងួន ចាន់ដេវីត បានធ្វើឱ្យប្រជាជនខ្មែរស្ញប់ស្ញែងយ៉ាងខ្លាំង ព្រោះបទចម្រៀងមួយបទនេះបានបង្កប់នៅអត្ថន័យដ៏អស្ចារ្យនិយាយពីប្រទេសកម្ពុជាដ៏អច្ឆរិយ និងទំនុកភ្លេចស្តាប់ហើយព្រឺសម្បុរ ។ ក្នុងអត្ថន័យនចម្រៀងនេះ បានលើកតម្កើងពីជាតិខ្មែរ ។ បទ មហានគរ ក៏បានបញ្ចូលជាមួយឧបករណ៍ភ្លេងខ្មែរជាច្រើន ហើយកំពុងតែឈរលើលំដាប់ថ្នាក់លេខ៣លើយូធូប ៕
